Topic 30:
Saare Bhartiya bhrashtachar aur sarkari babuo ki rishwat khori ko achi tarike se jaante hae. Bharat azadi ke baad se hi is rishwatkhori aur chai pani chalan ki wajaa se boht nuqsan uthata aaya hae. Har rajnitig party chahe wo koi bhi wo bhrashtachar ke khilaf bade bade naare lagati hae lekin koi bhi party ho jab wo satta me baith jati hai is bhrashtachar ke khilaf koi qadam nahi uthati, naam ke liye thoda idhar udhar kar deti hae. Hum Bharatiya log bhi ek samay to pore josh se bhrashtachar ke khilaf maidan me utar te hae, fir thode samay baad sab kuch bhul kar apne gharou ko laut jate hae, dobara usi bhrashtachar ki duniya me.
Mae har sarkar, Kendra ki sarkar se lekar har rajya ki sarkar, har nagar nigamo se anurodh karta hu is bhrashtachar ke khilaf ya tou kendriya qanun ya tou rashtriya qanun banaye (ek rashtra ka qanun dusre rashtra ke qanun me mamuli sa hi antar ho). Is qanun ka sabse mukhya pravadhan ye ho ke rishwat khori ek ghair zamanati jurm bana diya jaye. Aur khud ko nirdosh sabit karne ki zimmedari bhi isme fase huwe sarkari afsar ki hi ho. Iski saza bhi kathin rakhi jaye lag bhag chauda saal tak qaid ba mushakkat.
Bhrashtachar aur rishwatkhori ka sarkari afsar is tarike se paalan karte hae ke jaise ye hamare samwidhan me adarsh ho, jaise ke: Hum Bharat ke log Bharat ko ek Brhastacharwaadi desh banana chahte hae, shayad aesa kuch, aese palan kiya jata hae ke kahi bhrashtachar hamare desh me buniyadi zimmedari tou nahi hae! Naare lagane se , shunya ki note baantne se kuch nahi hone wala, ye sab to sirf apne aap ko jhuti tasalli dena hae.
Ek taraf to sarkari afsaro ka wetan aur labh har saal badhaya jaate hae, aur dusri taraf unki rishwatkhori bhi utni hi tezi se badhti chali jati hae. Bharat me passport, election card, ration card, driving license, bijli sewa, pani sewa, karkhano ke license, janam patr, mrityu patr, police me shikayat, koi sarkari anumati aur kya nahi ye sab pane ke liye rishwat zaruri ho gayi hae. Apka Bhartiya hona, apka buniyadi haq, ye sab baato ko kachre ke dibbe me daal diya jaate hai. Agar apke paas rishwat dene ko paise hae to apka kaam ho jayega, warna aap ko kisi dushman rashtra ka jasus samjha jayega.
Sirf kuch afsaro ko nishkashit kar dene se aur uske baad dhimi gati ki nyay pranali me mamla chale jane se desh ka bhrashtachar nahi ruke ga, aur naahi rukegi Bharat ke logo ki pidha. Mae sari sarkarou se anurodh karta hu ke Bharat ke khatir, kendriya sarkar, aur sari rajya sarkare, aur sare nagar nigam aese bill sansad, vidhan shabaou aadi me laaye. Aur mae sare ke sare kendriay aur rajyo ke vipaksh se bhi anurodh karta hu ke aese bill ko pore dil se apna paksh de.
Jab koi Bharatiya kisi sarkari afsar ke paas koi kaam lekar jata hae to wo uska haq hae, aur jab koi chiz hamara haq ho to uske liye (sarkari fees chhod kar) paise kyu de? Hum rishwat kyu dete hae, kyuki hamare qanuni kaam nahi bante. Sarkari afsar yehi qanuni kaam karne ki rishwat lete hae ya to fir kisi ghair qanuni kaam ki rishwat lete hae, pehle wale mamle me to ek aam admi majbur hae rishwat dene ke liye. Isi ko maan kar hume rishwat dene wale admi ko chhod dena chahiye kyuke ose majbur kiya gaya hota hae aur uspar koi jawabdari nahi honi chahiye.
Aur jo dusra mamla hae jaha koi ghair qanuni kaamo ke liye rishwat deta hae tab bhi ghair zamanati arop aur ba mashakkat qaid ka prawadhan sirf sarkari afsar ke liye hi hona chahiye, kyuke wo uski hi zimmedari hae ke ghair qanuni kaam na hone de. Iska ye matlab nahi hae wo wyakti jog hair qanuni kaam karwane aaya tha ose yuhi chhod dena chahiye balke ose bhi maujuda laagu qanuno ke tehat mujrim banana chahiye. Magar kisi bhi haal me ek aam admi jisko rishwat dene ke liye majbur kiya gaya ho ose beghair kisi aarop ke chhod dena chahiye.
Angrezi me: Make bribery a Non-bailable offense in India!
No comments:
Post a Comment